El Teixu

El Teixu, Rede pal Estudiu y Defensa de la Llingua Asturllionesa acusa públicamente al Conceyu de Cuideiru, ya en particular al sou alcalde, Ignacio Escribano Fernández, d’inacción ya ineficacia absolutas na proxectada retulación viaria de los barrios ya caminos de la parroquia de Samartín.

El 14 de diciembre del 2018 El Teixu presentóu unas alegaciones a la nomenclatura propuesta pol Conceyu de Cuideiru pa retular los barrios ya los caminos de la parroquia. Nesas alegaciones defendíase que la retulación viaria s’axustara a las denominaciones populares de llugares, barrios ya caminos, tal cumo vienen siendo usadas tradicionalmente polos vecinos ya vecinas de la parroquia, ya ofrecíanse xustificaciones de tipu lingüísticu ya etimolóxicu a fin de treslladar correctamente a la retulación pública la toponimia popular. Más de trés meses despuéis d’acabáu el plazu d’alegaciones nun houbo respuesta municipal oficial ya n’El Teixu barruntan que’l conceyu nun vei proceder a instalar la señalización cola toponimia popular de la parroquia de Samartín, que foi aprobada por unanimidá en plenu del 30 de noviembre del 2018.

Continue reading →

El Teixu, Rede pal Estudiu y Defensa de la Llingua Asturllionesa presenta esti vienres 25 de xineiru’l primer númaru de la su colección Cartografía toponímica del espaciu lingüísticu asturllionés: un mapa de Tinéu que representa los nombres tradicionales de tódolos ḷḷugares ya brañas del conceyu, recoyíos directamente n’encuestas a los vecinos, amás de datos d’oronimia ya hidronimia. La presentación vei facese a las 19:30 horas na Sala d’Actos de la Oficina de Turismu (plaza d’El Fontán, 22).

El mapa inclúi tódolos nombres de pueblos ya brañas ya unos douscientos cincuenta barrios ya casas, ya tamién más de douscientos picos, altos, regueiros ya outros elementos naturales. Ḷḷugares cumo Xinestaza, Oubona, La Preda, Bourres, Xera ou Caeras; brañas cumo Buḷḷacente, Silvayyana, La Faxera, Beisapía, Brañascardén ou Fontes; cursos d’augua cumo El Ríu Faxeirúa, El Regueiru Ḷḷamazar ou El Ríu Esva; picos cumo Penafilera, El Picu Moḷḷeirosu ou La Pena la Dormidoira… Alredor de sietecientos topónimos, recoyíos íntegramente n’encuestas orales feitas en tódalas parroquias del conceyu, xúntanse nesti trabayu a todu color publicáu por El Teixu, qu’incorpora tamién un mapa parroquial del conceyu, una cartografía de las zonas vaqueras ya xaldas, ya l’enganche a un documentu electrónicu au s’explican los criterios cartográficos ya lingüísticos que se siguienon pa facer el mapa.

Continue reading →

Entrega de premios del I Concursu Infantil de Recoyida de Toponimia Oral na Valdería

Irene Turrado Cenador, alumna del CRA Eria-Jamuz, resultóu ganadora del  I Concursu Infantil de Recoyida de Toponimia Oral na Valdería, organizáu por El Teixu, Rede pal Estudiu y Defensa de la Llingua, con un trabayu sobre Castrucarbón. Los segundos premios fueron pa Carla Aparicio Turrado, na categoría de 3 a 6 años, que recoyíu la toponimia de Felechares, Joel Oller Gastón, na categoría de 6 a 9 años, qu’estudiou los ñombres de Torneiros, y Sebastián Pérez Carrera, na de 10 a 14 años, con un estudio sobre los topónimos de San Feliz. Los premios, consistentes nun lote de llibros y de productos artesanos, fueren entregaos esta mañana nel Centru Cultural de Ñogareyas, no marcu de las VI Xornadas de Patrimoniu Lingüísticu y Cultural organizadas por El Teixu.

El xuri, formáu pola filóloga estudiosa de la fala de La Valdería Isidora Rivas Turrado, l’expertu en xeografía y arqueoloxía Andrés Menéndez Blanco y el sociólogu Dennis Álvarez Guerrero, decidíu premiar estos trabayos entre los veinti presentaos a concursu, por ser aquellos que meyor representaban los ñombres tradicionales de los sitios, de la manera qu’ontavié se puede sentir entre los habitantes de La Valdería.

Continue reading →

El Teixu, Rede pal Estudiu y Defensa de la Llingua Asturllionesa acaba  presentar, cola ayuda de l’Asociación de Vecinos Nuestra Señora de los Dolores, y cola colaboración destacada de Carolina Castro y Vanesa Álvarez, alegaciones a la nomenclatura propuesta pol Conceyu de Cuideiru pa la toponimia de la parroquia de Samartín. El documentu d’alegaciones busca que’l consistoriu respecte los nomes tradicionales que la vecindá sigue usando pa facer referencia a los sitios de la parroquia.

El plenu del Conceyu de Cuideiru aprobóu, el pasáu 30 de noviembre, l’expediente “Relación de caminos y/o viales de La Escalada, Castañedo, Argatón, Mumayor y Beiciella en San Martín de Luiña (Cudillero)”, col que se pretende normalizar ya retular los barrios y caminos d’estos cinco nuclios de la parroquia de Samartín. En virtú del procedimientu d’exposición pública del expediente, Carolina Castro ya Vanesa Álvarez, vecinas de la parroquia, presentanon esti vienres 14 un documentu de revisión ya propuesta de modificación del mesmu, redactáu xunto con miembros d’El Teixu ya l’A.VV. Nuestra Señora de los Dolores.

Continue reading →

El Teixu, Rede pal Estudiu y Defensa de la Llingua Asturllionesa celebra los próximos sábadu 22 y domingu 23 de diciembre, cona colaboración de la Xunta Vecinal de Ñogareyas y de numerosas empresas locales, una nueva edición de las Xornadas de Patrimoniu Lingüísticu y Cultural, qu’esti añu tendrán llugar na Valdería.  El centru cultural, la tabierna y la ilesia de Ñogareyas van acoyer un ampliu programa que contará cona presencia de Fernando Álvarez-Balbuena, Andrés Menéndez, José R. Morala, Mónica Rodríguez, Alcides Meirinhos, Nicolás Bartolomé, José Luis Gutiérrez, Máximo Carracedo, Isidora Rivas y Carlos Huerta.

Continue reading →

Las asociaciones El Teixu, Faceira y Furmientu remitieron al Conseyu d’Europa un informe denunciando que la Xunta de Castiella y Llión infrinxe sistemáticamente la Carta Europea de las Llinguas Rexionales ou Minoritarias (CELRM) del Conseyu d’Europa y las recomendaciones d’esta organización internacional de 2012 y 2016 pa la promoción del llionés. Esta organización internacional tampouco nun recibíu nin de la Xunta de Castiella y Llión, nin del Estáu Español, garante del cumprimientu d’esti tratáu internacional de defensa de las llinguas minoritarias europeas, la información que se-ys solicita dende l’añu 2012 sobre la situación y las mididas adoptadas pa la promoción del llionés.

Continue reading →

El Teixu, Rede pal Estudiu y Defensa de la Llingua Asturllionesa, convoca’l I Concursu Infantil de Recoyida de Toponimia Oral na Valdería, dirixíu al alumnáu menor de 14 años d’esta comarca. Los trabayos tienen que entregase antias del 4 de diciembre nas dependencias de las escuelas de Castrucarbón ou Castrucontrigu.

Con esti concursu quier animase a los rapaces y rapazas de La Valdería a convertise en pequeños investigadores de la toponimia de la súa contorna, escoyendo buenos informantes a través polos cuales puedan conecer los ñombres de los sitios de la comarca. El modelu que se presenta a los alumnos permite que recueyan todu tipu de topónimos, asina cumo liendas y historias relacionadas conos sitios del sou pueblu. Amás, incluise la posibilidá de debuxar un mapa del llugar escoyíu pa la investigación.

Continue reading →

El Teixu, Rede pal Estudiu y Defensa de la Llingua Asturllionesa organiza esti vianres 28 de setiambre en Cuideiru la charla Cuideiru ¿por quei?: Historia, situación ya recuperación de los topónimos autóctonos del conceyu de Cuideiru, qu’impartirá’l lingüista Fernando Álvarez-Balbuena García. L’actu vei ser na Casa de Cultura de Cuideiru (La Cai, s/n) a partir de las 19:30 horas ya la entrada yá de baldre.

Tras l’exitu de la charla De Cuideiru a Vaḷḷouta organizada el pasáu 3 d’agostu n’Oubiñana, que contóu con una gran asistencia ya participación de la vecindá, El Teixu vualve organizar un nuavu actu sobre la toponimia del conceyu pixuatu. Con ello, la organización quiar aclarar las dudas sobre los nomes tradicionales de los llugares ya dar respuesta a dellas polémicas artificiales llevantadas en contra de la normalización de la toponimia de Cuideiru.

Continue reading →

El Teixu, Rede pal Estudiu y Defensa de la Llingua Asturllionesa organiza esti vienres 3 de agosto n’Oubiñana la charla De Cuideiru a Vaḷḷouta: Historia, situación ya recuperación de los topónimos autóctonos del conceyu de Cuideiru, qu’impartirá’l lingüista Fernando Álvarez-Balbuena García. L’actu vei tener llugar na Escuela de Riegurriba a partir de las 19:30 horas ya la entrada yá de badre.

La xente conoz bien los nomes que dienon tola vida en casa a los pueblos de Cuideiru ¿pero sabemos d’áu vienen esos topónimos? ¿Qué significa Vaḷḷouta, Reseḷḷinas, Salamir ou Cuideiru…? A esas preguntas vei tentar responder Álvarez-Balbuena na charla organizada por El Teixu, qu’amás vei tar abierta a la participación del públicu que quera dir a escuchar ou a aportar los sous conecimientos.

Continue reading →

Dende’l asociación El Teixu, Rede pal Estudiu y Defensa de la Llingua Asturllionesa, cumo promotora d’un trabayu de compilación y estudiu de toda a toponimia mayor da provincia de Zamora, queremos formular dalgunas cuestiones apartir da pergunta feita pol senador Carles Mulet sobre’l topónimu Rihonor de Castilla a instancia del asociación Ciudadanos del Reino de León (CCRL). Recientemente, el senador Mulet solicitóu no Senáu un informe al Ayuntamientu de Pedralba (Senabria) pa qu’aportara a documentación del procesu pol que Rihonor pasóu a chamase Rihonor de Castilla.

A pergunta tien fácil respuesta. A determinación “de Castilla” añedíeuse nel añu 1857, según se recuelle na páxina 354 del llibru “Variaciones de los municipios de España desde 1842“, editáu pol Ministerio de Administraciones Públicas: “Rionor pasa a llamarse Rihonor de Castilla. Censo 1857”. Con todo y con eso, pareznos qu’a propuesta de CCRL quedóu na superficie d’un problema mueito más profundu y qu’afecta cientos de llugares de Zamora y Llión. Mayor que’l ofensa que puede suponer al identidá llionesa a determinación “de Castilla” ye’l despreciu sistemáticu que-le dedica’l Alministración a os nomes populares de todos os llugares d’estas provincias. Un despreciu que vai dirixíeu, n’última instancia, a todos os vecinos y usuarios d’esos nomes conos que conocen os sitios qu’habitan. Una mirada a os estudios realizaos dende hai más d’un sieglu danos outra perspectiva del asuntu. En 1915 José Leite de Vasconcelos, lingüista portugués qu’estudióu a fala de Rihonor, escribía que “o povo pronuncia Ruidenor (observação que fiz em 1915)…” (“Breve estudo dos falares de Riodonor e Guadramil”, 1929, p. 743). Nel añu 1924, el lingüista alemán Fritz Krüger apuntóu el topónimu Ruidenor (“Mezcla de dialectos”, 1924, p. 9). Nel añu 2001 David García y Ricardo Boyano señalan qu’a forma más usada pola xente qu’encuestonen nesta zona ye Ruidenore (“Toponimia menor del noroeste de la provincia de Zamora: 3. Santa Cruz d’Abranes”, 2001, p. 63). Nel última década as encuestas feitas por miembros da nuesa asociación confirmonen l’usu habitual y común de Ruidenore entre os vecinos del ayuntamientu de Pedralba. Continue reading →