El Teixu colabora cono municipiu de Castrucarbón na recuperación de la toponimia na retulación viaria

Calle la Praza en Felechares

El municipiu de Castrucarbón está rematando un proxectu de visibilización de la toponimia urbana que consiste na colocación de placas conos ñombres de las calles, caminos y prazas de las súas pedanías. La iniciativa contóu cona participación d’El Teixu, Rede pal Estudiu y Defensa de la Llingua, qu’asesoróu al municipiu na elaboración del informe sobre la toponimia tradicional de los puebros de Calzada, San Feliz y Felechares.

L’informe toponímicu foi realizáu por un grupu de vecinos del municipiu, con Álvaro Lobato Fuertes cumo coordinador, y Isidora Rivas Turrado, Santiago Crespo García y Sergio Ballesteros Turrado cumo responsables de la investigación nos llugares de Calzada, San Feliz y Felechares, respectivamente. El Teixu aportóu l’asesoramientu técnicu y lingüísticu necesariu pa la correcta retulación de los topónimos.

Con esta actuación, Felechares, San Feliz y Calzada conviértense nos primeiros llugares de la provincia de Llión en retular la totalidá del sou viariu d’alcuerdu cona toponimia tradicional, recoyida directamente de boca de los habitantes, y cona ortografía asturllionesa. Ye de destacar qu’esta retulación se fai nuna comarca pola que cuerre la frontera lingüística cono castellanu y que constitúi actualmente unu de los límites orientales del espaciu lingüísticu asturllionés.

Continue reading
Posted in Uncategorized | Comentarios desactivados en El Teixu colabora cono municipiu de Castrucarbón na recuperación de la toponimia na retulación viaria

El Conseyu d’Europa insta a la introducción del llionés nel Sistema educativu de Castiella y Llión

El Conseyu d’Europa publicóu l’once de noviembre del 2019 l’informe quintu sobre l’aplicación n’España de la Carta Europea de las Llinguas Rexonales ou Minoritarias (CELRM), tratáu internacional ratificáu por España nel 2001 pa la protección de las llinguas minoritarias europeas, incluída la llionesa.

El Comité d’Expertos encargáu de supervisar regularmente’l cumplimientu d’esti tratáu n’España constatóu la desprotección continuada del llionés por parte de la Junta de Castilla y León, que nun desenvolvíu nel periodu examináu, del 2014 al 2016, ninguna de las actuaciones lexislativas y alministrativas que dispón esta norma internacional pa la protección del llionés.

El Conseyu d’Europa recordóu a las autoridades españolas y autonómicas el carácter normativu de la Carta Europea de las Llinguas Rexonales ou Minoritarias, y portanto la necesidá d’implementar sin demoranza mididas decididas pa la protección y promoción del llionés en Castiella y Llión, especialmente n’educación, cumo establez tamién l’artículu 5.2 del Estatutu d’Autonomía. Nesti sentíu, l’informe recuerda que, conforme al artículu 7.1.f de la CELRM, la enseñanza y l’estudiu del idioma llionés ha ofiertase en tódalas etapas educativas, cumo yá pasa en Castiella y Llión col gallegu, la outra llingua minoritaria protexida de la comunidá según l’artículu 5.3 del Estatutu d’Autonomía.

(Nota de prensa conxunta de las asociaciones Furmientu, Faceira y El Teixu)

Posted in Uncategorized | Tagged , , , , | Comentarios desactivados en El Conseyu d’Europa insta a la introducción del llionés nel Sistema educativu de Castiella y Llión

El Teixu participa na mesa redonda «Baillando nun mesmu idioma»

Baillando nun mesmu idioma

L’asociación «Andecha Folclor d’Uviéu» celebra los sos 30 años de vida organizando una xornada dedicada a la llingua y la música tradicional de tol espacio asturllionés. Dientro de los actos inclúin una mesa redonda con representantes d’organizaciones que trabayen pola redignificación de la llingua asturllionesa en Portugal, Llión y Asturies. Van participar les persones que siguen:

– Iván Llera, d’Iniciativa pol Asturianu.
– Xulio Casado, de la Xunta pola Defensa de la Llingua Asturiana.
– Penélope Miranda, del Serviciu de Normalización Llingüística de Ḷḷena.
– José Ignacio Suárez, de Faceira.
– Andrés Menéndez, d’El Teixu.
– Miguel Ánxel Montenegro, de Reciella.
– Alcides Meirinhos, de l’Associaçon Lhéngua i Cultura Mirandesa.

L’actividá será’l día 2 de noviembre a les 12:00 na Plaza’l Pescao de Trascorrales (Uvieo).

Posted in Uncategorized | Comentarios desactivados en El Teixu participa na mesa redonda «Baillando nun mesmu idioma»

Las prácticas del cursu d’encuestación d’El Teixu recueyen la toponimia tradicional de Trueitas

LOS ÑOMBRES POPULARES SERÁN USAOS POL AYUNTAMIENTU
NUN MAPA TURÍSTICU QUE S’EDITARÁ NUNOS MESES

El «III Cursu d’Encuestadores de la Tradición Oral en Llión» organizáu por El Teixu, Rede pal Estudiu y Defensa de la Llingua Asturllionesa y l’Institutu d’Estudios Cabreireses acabóu esta fin de somana cona realización de las crases prácticas. Los resultaos del trabayu d’encuestación por Cabreira valieron pa recoyer la toponimia tradicional de Trueitas, así cumo pa trazar isoglosas desconocidas hasta agora na dialectoloxía cabreiresa.

Fernando Álvarez-Balbuena García, Andrés Menéndez Blanco y Iván Martínez Loboguioron esti sábadu y domingu las crases prácticas del III Cursu d’Encuestadores de la Tradición Oral en Llión organizáu por El Teixu y l’Institutu d’Estudios Cabreireses. Nas salidas pol territoriu de Trueitas, l’alumnáu del cursu pudo escuitar de la boca de los propios vecinos los ñombres tradicionales de los sitios, descripciones de tradiciones locales u muestras de literatura oral, así cumo participar nuna encuesta dialectolóxica sobre los límites de la fala cabreiresa.

Unu de los obxectivos principales de las crases prácticas foi la documentación de los topónimos populares del términu municipal de Trueitas, tanto menores cumo mayores. Los ñombres sacaos n’encuestas polos alumnos, xunto con outros recoyíos tamién n’encuestas directas a la población polos miembros d’El Teixu, serán comunicaos al Ayuntamientu de Trueitas, colaborador del cursu, pa la elaboración d’un mapa d’información turística del municipiu, que s’editará nunos meses. Pa ello recoyóronse tolos ñombres de los sitios catalogaos con interés arqueolóxicu, cumo los de las zonas mineiras de Corporales: El Cabritu, El Veneiru, El Covenayu de las Rubias, La Maseira, El Fueyu u El Castrellón. Tamién se buscoron los ñombres de tolos outros sitios d’interés patrimonial inventariaos, cumo molinos, ermitas, igresias, frauguas u palombares. Pa completar la cartografía toponímica cabreiresa, buscóronse las denominaciones de los principales montes, picos y rieus, que mueitas veces cambian respecto a los que vemos nos mapas oficiales: El Carbayal por “El Carbajal”, El Llagu por “Lago de Truchillas”, La Llaguna por “Laguna Malicioso”, El Castiellu por “El Castillo”, Peñéu Canales por “Pico de Valteleno”, etc.

Las prácticas del cursu tuvieron tamién resultaos mui proveitosos no que fai a la dialectoloxía. Las encuestas feitas col alumnáu reveloron la existencia d’isoglosas qu’acercan a La Valdería la fala de los trés llugares más orientales de Cabreira, algo que pasara desapercibíu a los trabayos de Concha Casado y del restu d’investigadores que s’ocuporon d’esta comarca. Esti descubrimientu demuestra una vez más la ñecesidá de siguir investigando la realidá de la llengua asturllionesa, que nesti y outros territorios continúa siendo desatendida pola investigación lingüística.

Cono Cursu d’Encuestadores de la Tradición Oral, actividá formativa que yá foi desenvuelta en Zamora, Llión, Viḷḷablinu y agora en Trueitas, El Teixu ofrez una oportunidá única p’aprender la metodoloxía y la ferramienta de la encuestación, permitiendo al alumnáu colaborar na salvaguarda de la tradición oral llionesa y participar na recuperación de la literatura oral, la toponimia, la diversidá lingüística y la música tradicional. Amás de ser l’únicu cursu de las sues características existente no ñuesu ámbitu, resultaos cumo los consiguíos esta fin de somana demuestran la ñecesidá de continuar con esti tipu d’iniciativas.

Posted in Uncategorized | Comentarios desactivados en Las prácticas del cursu d’encuestación d’El Teixu recueyen la toponimia tradicional de Trueitas

Trueitas acueye’l «III Cursu d’Encuestadores de la Tradición Oral en Llión» d’El Teixu

EL CURSU CHEGA A CABREIRA NUNA EDICIÓN GRATUITA, CON CRASES
NOS FINES DE SOMANA ENTRE’L 21 DE SETIEMBRE Y EL 6 D’OUTUBRE

El Teixu, Rede pal Estudiu y Defensa de la Llingua Asturllionesa, organiza, xunto al Institutu d’Estudios Cabreireses y cona colaboración del Ayuntamientu de Trueitas, el «III Cursu d’Encuestadores de la Tradición Oral en Llión». Las crases pondranse en trés fines de somana (21, 22, 28 y 29 de setiembre y 5 y 6 d’outubre) na Aula Cabreiresa de Trueitas. El cursu, pal que yía necesario apuntarse, yía gratuitu y tien conteníos introductorios accesibles pa tola xente interesada, sin necesidá de formación previa na materia.

Despuéis de la actividá formativa desenvuelta n’años anteriores en Zamora, Llión y Viḷḷablinu, El Teixu lleva’l sou cursu d’encuestadores a Cabreira, una tierra bien conecida pola conservación de la llengua asturllionesa y la tradición oral tresmitida a lo llargo de los siegros. El Teixu continúa asina cono propósitu de llevar las sues actividades a tol territoriu de fala asturllionesa.

Cumo n’ediciones anteriores, las cuatro primeiras sesiones estarán centradas en cuestiones teóricas introductorias sobre encuestación, literatura oral, dialectoloxía, música tradicional ou toponimia, que se podrán poner en práctica los últimos dous días, dedicaos a crases prácticas d’encuestación polos distintos llugares de Cabreira. En total, serán 22 horas teóricas y 21 prácticas repartidas a lo llargo de trés fines de somana.

El cursu será impartíu por Fernando Álvarez-Balbuena, Iván Martínez Lobo, Isidora Rivas Turrado, Xosé Antón Fernández «Ambás», Ramsés Ilesies Fernández, Nicolás Bartolomé Pérez y Andrés Menéndez Blanco. Todos eillos tienen, nas sues respectivas arias de trabayu, una amplia experiencia na recoyida de tradición oral y un gran conecimientu de la comarca cabreiresa y las zonas limítrofes.

El cursu yía gratuitu pero requier inscripción previa. Tolas personas interesadas pueden matricularse ou solicitar más información escribiendo a la dirección electrónica info.elteixu@gmail.com ou acudiendo al Ayuntamientu de Trueitas.

Con esta actividá las personas interesadas pueden aprender la metodoloxía y la ferramienta de la encuestación pa colaborar na salvaguarda de la tradición oral llionesa, participando na recuperación de la literatura oral, la toponimia, la diversidá lingüística y la música tradicional. L’alumnáu colaborará activamente no rexistru de ñombres, cuentos, cantares y historias cabreiresas y podrán continuar esi trabayu recoyendo outros tesouros orales nesta comarca ou noutros territorios.

El Teixu, Rede pal Estudiu ya Defensa de la Llingua asturllionesa yía una asociación fundada no 2007 n’Estorga por xente de La Tierra de Miranda, Zamora, Llión y Asturias pa defender l’asturllionés dende la sue unidá y el respectu a las variedades internas. A esi fin desenvuelve actividades d’estudiu, divulgación y promoción por tol ámbitu del idioma.

Posted in Cursos | Tagged , , , , , , , , , , , , | Comentarios desactivados en Trueitas acueye’l «III Cursu d’Encuestadores de la Tradición Oral en Llión» d’El Teixu

III Cursu d’Encuestadores de la Tradición Oral en Llión

Los días 21, 22, 28 y 29 de setiembre y 5 y 6 d’outubre del 2019 impartiráse’l III Cursu d’Encuestadores de la Tradición Oral en Llión. Esti añu facémoslu en Trueitas de la mano del Institutu d’Estudios Cabreireses y cona colaboración del Ayuntamientu de Trueitas. Deixamos iquí debaxo’l dípticu con tola información básica y el programa de crases:

Posted in Cursos | Comentarios desactivados en III Cursu d’Encuestadores de la Tradición Oral en Llión

El Teixu acusa al alcalde de Cuideiru d’ineficacia absoluta pola falta de retulación viaria de la toponimia de Samartín

El Teixu, Rede pal Estudiu y Defensa de la Llingua Asturllionesa acusa públicamente al Conceyu de Cuideiru, ya en particular al sou alcalde, Ignacio Escribano Fernández, d’inacción ya ineficacia absolutas na proxectada retulación viaria de los barrios ya caminos de la parroquia de Samartín.

El 14 de diciembre del 2018 El Teixu presentóu unas alegaciones a la nomenclatura propuesta pol Conceyu de Cuideiru pa retular los barrios ya los caminos de la parroquia. Nesas alegaciones defendíase que la retulación viaria s’axustara a las denominaciones populares de llugares, barrios ya caminos, tal cumo vienen siendo usadas tradicionalmente polos vecinos ya vecinas de la parroquia, ya ofrecíanse xustificaciones de tipu lingüísticu ya etimolóxicu a fin de treslladar correctamente a la retulación pública la toponimia popular. Más de trés meses despuéis d’acabáu el plazu d’alegaciones nun houbo respuesta municipal oficial ya n’El Teixu barruntan que’l conceyu nun vei proceder a instalar la señalización cola toponimia popular de la parroquia de Samartín, que foi aprobada por unanimidá en plenu del 30 de noviembre del 2018.

Continue reading

Posted in Uncategorized | Comentarios desactivados en El Teixu acusa al alcalde de Cuideiru d’ineficacia absoluta pola falta de retulación viaria de la toponimia de Samartín

El Teixu presenta esti vienres en Tinéu el mapa cola toponimia tradicional del conceyu

El Teixu, Rede pal Estudiu y Defensa de la Llingua Asturllionesa presenta esti vienres 25 de xineiru’l primer númaru de la su colección Cartografía toponímica del espaciu lingüísticu asturllionés: un mapa de Tinéu que representa los nombres tradicionales de tódolos ḷḷugares ya brañas del conceyu, recoyíos directamente n’encuestas a los vecinos, amás de datos d’oronimia ya hidronimia. La presentación vei facese a las 19:30 horas na Sala d’Actos de la Oficina de Turismu (plaza d’El Fontán, 22).

El mapa inclúi tódolos nombres de pueblos ya brañas ya unos douscientos cincuenta barrios ya casas, ya tamién más de douscientos picos, altos, regueiros ya outros elementos naturales. Ḷḷugares cumo Xinestaza, Oubona, La Preda, Bourres, Xera ou Caeras; brañas cumo Buḷḷacente, Silvayyana, La Faxera, Beisapía, Brañascardén ou Fontes; cursos d’augua cumo El Ríu Faxeirúa, El Regueiru Ḷḷamazar ou El Ríu Esva; picos cumo Penafilera, El Picu Moḷḷeirosu ou La Pena la Dormidoira… Alredor de sietecientos topónimos, recoyíos íntegramente n’encuestas orales feitas en tódalas parroquias del conceyu, xúntanse nesti trabayu a todu color publicáu por El Teixu, qu’incorpora tamién un mapa parroquial del conceyu, una cartografía de las zonas vaqueras ya xaldas, ya l’enganche a un documentu electrónicu au s’explican los criterios cartográficos ya lingüísticos que se siguienon pa facer el mapa.

Continue reading

Posted in Uncategorized | Comentarios desactivados en El Teixu presenta esti vienres en Tinéu el mapa cola toponimia tradicional del conceyu

Irene Turrado, de Castrucarbón, gana’l concursu infantil de recoyida de toponimia d’El Teixu

Entrega de premios del I Concursu Infantil de Recoyida de Toponimia Oral na Valdería

Irene Turrado Cenador, alumna del CRA Eria-Jamuz, resultóu ganadora del  I Concursu Infantil de Recoyida de Toponimia Oral na Valdería, organizáu por El Teixu, Rede pal Estudiu y Defensa de la Llingua, con un trabayu sobre Castrucarbón. Los segundos premios fueron pa Carla Aparicio Turrado, na categoría de 3 a 6 años, que recoyíu la toponimia de Felechares, Joel Oller Gastón, na categoría de 6 a 9 años, qu’estudiou los ñombres de Torneiros, y Sebastián Pérez Carrera, na de 10 a 14 años, con un estudio sobre los topónimos de San Feliz. Los premios, consistentes nun lote de llibros y de productos artesanos, fueren entregaos esta mañana nel Centru Cultural de Ñogareyas, no marcu de las VI Xornadas de Patrimoniu Lingüísticu y Cultural organizadas por El Teixu.

El xuri, formáu pola filóloga estudiosa de la fala de La Valdería Isidora Rivas Turrado, l’expertu en xeografía y arqueoloxía Andrés Menéndez Blanco y el sociólogu Dennis Álvarez Guerrero, decidíu premiar estos trabayos entre los veinti presentaos a concursu, por ser aquellos que meyor representaban los ñombres tradicionales de los sitios, de la manera qu’ontavié se puede sentir entre los habitantes de La Valdería.

Continue reading

Posted in Uncategorized | Comentarios desactivados en Irene Turrado, de Castrucarbón, gana’l concursu infantil de recoyida de toponimia d’El Teixu

El Teixu impulsa alegaciones a la retulación pública de la toponimia de Samartín (Cuideiru)

El Teixu, Rede pal Estudiu y Defensa de la Llingua Asturllionesa acaba  presentar, cola ayuda de l’Asociación de Vecinos Nuestra Señora de los Dolores, y cola colaboración destacada de Carolina Castro y Vanesa Álvarez, alegaciones a la nomenclatura propuesta pol Conceyu de Cuideiru pa la toponimia de la parroquia de Samartín. El documentu d’alegaciones busca que’l consistoriu respecte los nomes tradicionales que la vecindá sigue usando pa facer referencia a los sitios de la parroquia.

El plenu del Conceyu de Cuideiru aprobóu, el pasáu 30 de noviembre, l’expediente “Relación de caminos y/o viales de La Escalada, Castañedo, Argatón, Mumayor y Beiciella en San Martín de Luiña (Cudillero)”, col que se pretende normalizar ya retular los barrios y caminos d’estos cinco nuclios de la parroquia de Samartín. En virtú del procedimientu d’exposición pública del expediente, Carolina Castro ya Vanesa Álvarez, vecinas de la parroquia, presentanon esti vienres 14 un documentu de revisión ya propuesta de modificación del mesmu, redactáu xunto con miembros d’El Teixu ya l’A.VV. Nuestra Señora de los Dolores.

Continue reading

Posted in Uncategorized | Comentarios desactivados en El Teixu impulsa alegaciones a la retulación pública de la toponimia de Samartín (Cuideiru)