Ámbitu xeográficu

La determinación del ámbitu territorial de la llingua asturllionesa inda ta pendiente d’un estudiu xeolingüísticu que precise con detalle la implantación xeográfica real del idioma y las presumibles raluras que se pueden dar dientro d’esi espaciu. Con todo y con eso, puede afirmase que l’asturllionés ocupa güei una área que s’estiende polas provincias d’Asturias, Llión y Zamora y pol districtu de Bregancia.

N’Asturias l’área falante d’asturllionés ocupa la mayor parte del territoriu, cona excepción de los estremos occidental y oriental. Na parte occidental, la frontera traviesa los conceyos de Navia (deixando cumo puntos estremos de fala asturllionesa los llugares de Soirana, Fontes, Piñeira, La Polavieya, El Somuertu, Busmargalín y La Braña’l Ríu), Villayón (onde son falantes d’asturllionés las parroquias d’Oneta, Villayón –sacante’l llugar de Ribalaugua, de fala gallegoportuguesa–, Busmente y Eirías, y Parḷḷeiru –sacante’l llugar de Lhandequintá, onde se fala gallegoportugués–), Ayande (onde fala asturllionés la parte oriental del conceyu al leste del altu d’El Palu, más los llugares d’El Rebollu y Valdegallía –güei deshabitáu–, pertenecientes a la parroquia de Santa Colomba) y Ibias (onde la zona falante d’asturllionés ocupa solamente la parroquia d’A Estierna). Na parte oriental d’Asturias la frontera lingüística traviesa’l conceyu de Llanes (deixando del llau falante d’asturllionés las parroquias d’Andrín, San Roque y Purón) y más al meudía coincide cona raya ente los conceyos de Cabrales –falante d’asturllionés oriental– y El Valle Altu de Peñamellera.

Algo más complicao resulta determinar con precisión el territoriu de la provincia de Llión au se fala güei asturllionés, por mor de la falta de datos. En cualquier casu, parez posible aventurar qu’esa área ocupe a lo menos los municipios noroccidentales de Forniella, Páramu, Palacios, Ḷḷaciana, Vabia d’Arriba y Vabia d’Abaxo, amás de parte de las comarcas d’Oumaña, Ordás, La Cepeda, Maragatos, La Veiga’l Tuertu, La Valduerna, El Valle Jamuz y La Valdería. Igualmente, l’asturllionés ta implantáu na metá oriental d’El Bierciu hasta una linia que, contra l’occidente, inclúi en todo ou en parte los términos municipales d’Al Fabeiru, Veiga, Sancéu, Cabañas, Ponferrada y Prianza, cona excepción d’una área de la contorna de la capital berciana –qu’inda ta por determinar– au se producíu la substitución reciente del asturllionés pol castellanu. Más al sur d’El Bierciu fálase asturllionés nas comarcas de Cabreira l’Alta, Llousada y La Ribeira (que suelen denominase xuntamente “Cabreira”, en sentíu ampliu), sacante la parte fondera del valle del ríu Cabreira, que dende los llugares de Robledo y Castro contra l’oeste yía zona falante de gallegoportugués. Al oriente de toda esta área llionesa descrita hasta eiquí, hai llugares qu’acasu mantengan una fala con mayoría de trazos lingüísticos asturllioneses en comarcas cumo’l norte de La Ribera l’Órbigu, Ḷḷuna, Gordón y Los Argüeyos. Bien deseparáu xeográficamente de toda esta zona, pero en contactu territorial cona área asturiana falante d’asturllionés oriental, el conceyu de Sayambre –no nordeste de la provincia– mantién una fala asturllionesa. En cuanto al términu municipal de Valdión, vecín de Sayambre pol oriente, yía territoriu falante de castellanu, incluyendo’l llugar de Caín, onde, con todo, el componente asturllionés de la fala yía mayor que nos outros pueblos del municipiu.

L’área actual d’implantación del asturllionés na provincia de Zamora comprende’l centru y l’oriente de la comarca de Senabria, excluídas la zona occidental de la demarcación –al oeste d’A Portela de Padornelo y de Calabor–, que fala gallegoportugués, y una área centro-oriental –al norte y al leste de la capital comarcal– au parez predominar yá l’elementu lingüísticu castellanu. Amás d’esto, las falas asturllionesas ocupan una parte inda non bien determinada de La Carbayeda, asina cumo –más al sur– el terciu occidental de la comarca d’Aliste..

No districtu de Bregancia la extensión actual del asturllionés ta limitada a dous llugares fronteirizos del conceyu de Bregancia (Ruidenore –na raya con Senabria– y Guadramil –na raya con Aliste–), al conceyu de Miranda (cona excepción de la propia ciudá de Miranda y de los pueblos d’Atanor y Teixeira, que falan gallegoportugués) y a trés llugares del conceyu de Viminosu (Angueira, Caçareillos y Vilassecu). Outramiente, no conceyu de Bregancia nun ta clara l’adscripción actual de las falas de los llugares de Deilán y Petisqueira, situaos al sur de Guadramil, que presentan una proporción elevada d’elementos lingüísticos asturllioneses.

Comments are closed.