El Teixu asesora a Faceira na realización d’un mapa cona toponimia tradicional de Cabreira

El Teixu, Rede pal Estudiu y Defensa de la Llingua Asturllionesa asesoróu a l’Asociación Faceira na realización d’un mapa de Cabreira cona toponimia tradicional d’esta comarca llionesa. El mapa, que vai presentase esti sábadu, 11 de santamarina, na Fiesta de Cabreira en Ñogare, recuéi los ñomes de tódolos llugares cabreireses, amás de los principales picos, rieos y llagos. El Teixu puxo a disposición de Faceira los topónimos tradicionales recoyieos pola asociación en distintas encuestas feitas a personas mayores de los cinco términos municipales cabreireses.

Esta nun yia la única actividá qu’El Teixu está realizando actualmente na comarca. Nas últimas sumanas chegóu tamién a los distintos conceyos de Cabreira la campaña de retulación de locales públicos, desenvolvida cono títulu “Na llengua de casa”, que quier facer visible l’asturllionés nos espacios de socialización cotidiana, de maneira que la llengua esteya presente neillos con normalidá. Esta campaña empicipióu yá no 2013 con gran éxitu no conceyu de Torenu y extendieuse dende aquella por distintos llugares d’El Bierciu, Páramu, Palacios y Ḷḷaciana.

Continue reading

Posted in Uncategorized | Leave a comment

Condolencias pola muorte d’Amadeu Ferreira

El Teixu, Rede pal Estudiu y Defensa de la Llingua Asturllionesa, quier tresmitir a l’Associaçon de la Lhéngua i Cultura Mirandesa, a la sue familia y a todu’l puobru mirandés la nuossa prefunda tristeza pola muorte d’Amadeu Ferreira. La sue figura, central na reivindicación y nel renacimientu del mirandés, deixa un uocu que vai ser difícil d’anchir y justifica tódalas houmenaiges que se le puodan rendir.

El traballu qu’Amadeu Ferreira fizo na Tierra de Miranda pola defensa d’esta llengua que compartimos ye una hardancia que reivindicamos nós tamién cumo propia. Y pensamos que la mellor oufierta que podemos fazer a la sue memoria ye continar traballando pol futuru de la nuossa llengua. Anquanto l’asturllionés seguir eisistindo, Amadeu vai continar vivu na nuossa fala, cumo yá vive nos nuossos coraçones.

Posted in Uncategorized | Leave a comment

El Teixu presenta un mapa cola toponimia tradicional del conceyu de Tinéu

El Teixu, Rede pal Estudiu y Defensa de la Llingua Asturllionesa presenta un mapa de Tinéu que representa los nomes tradicionales de tódolos ḷḷugares del conceyu, recoíos directamente n’encuestas a los vecinos. Esti mapa, qu’inclúi tamién datos d’oronimia ya hidronimia, vei ser presentáu dientro del programa del homenaxe a Manuel Menéndez García que se celebra esti vienres 27 de febreiru, a partir de las 17:00 horas, na Casa de Cultura de Navelgas.

Ḷḷugares ya brañas cumo Xinestaza, Buḷḷacente, Xera, Silvayyana ou Caeras; cursos d’augua cumo El Ríu Mirayu, El Ríu Faxeirúa ou L’Esva; picos cumo Muḷḷeirosu, Penafilera ou Capieḷḷamartín… Alredor de setecientos topónimos, recoíos íntegramente n’encuestas orales feitas en tódalas parroquias del conceyu, xúntanse nesti trabayu a todu color publicáu por El Teixu, qu’incorpora tamién un mapa parroquial del conceyu, amás de territorios supralocales, casas sueltas, sierras ya puertos de montaña.

Continue reading

Posted in Uncategorized | Leave a comment

Ivo García Álvarez gana’l concursu de recoyida de toponimia oral n’El Bierciu d’El Teixu

Ivo García Álvarez resultóu ganador, cono trabayu “Toponimia menor de Quintana de Fuseros”, del primer Concursu de Recoyida de Toponimia Oral d’El Teixu na Comarca d’El Bierciu, convocáu por El Teixu, Rede pal Estudiu y Defensa de la Llingua Asturllionesa. El xuri decidíu tamién premiar con un accéssit el trabayu “Mapa de topónimos”, de l’autoría de José Álvarez González, y dedicáu tamién al llugar de Quintana. Esti concursu, organizáu cona colaboración del Instituto de Estudios Bercianos, y l’apoyu de las asociaciones Faceira, Fala Ceibe y el Colectivo Cultural “La Iguiada”, tien l’obxectivu de premiar la investigación sobre la toponimia tradicional de la comarca berciana.

Continue reading

Posted in Uncategorized | Leave a comment

El Teixu, Furmientu y Faceira denuncian nel Conseyu d’Europa l’incumprimientu del tratáu internacional que protexe la llingua llionesa

Las asociaciones en defensa de la llingua llionesa El Teixu, Furmientu y Faceira denuncian nun informe al Conseyu d’Europa que tanto l’Estáu Español como la Xunta de Castiella y Llión incumpren la Carta Europea de las Llinguas Rexonales ou Minoritarias. Dambas administraciones non solo nun realizoron actividades de promoción del llionés, sino que nin siquiera ufrioron información sobre la situación de la llingua, eliminándola asina de manera unillateral y illegal del ámbitu de protección del tratáu.

Continue reading

Posted in Uncategorized | Leave a comment

El Teixu lleva a Ḷḷaciana, Palacios, Páramu y El Bierciu oriental la súa campaña de normalización del asturllionés

El Teixu, Rede pal Estudiu y Defensa de la Llingua Asturllionesa, llevóu estas últimas sumanas a los territorios de Ḷḷaciana, Palacios, Páramu y l’oriente d’El Bierciu la súa campaña de retulación de locales públicos, desenvolvida baxo’l títulu “Na llingua de casa”. Esta iniciativa, que quier facer visible l’asturllionés nos espacios de socialización cotidiana, de manera que la llingua estía presente con normalidá, empicipióu yá l’añu pasáu con gran éxitu nel conceyu de Torenu.

Col obxectivu de visibilizar l’asturllionés nos municipios y comarcas citaos, miembros y colaboradores d’El Teixu están repartiendo de balde ente los comercios y establecimientos públicos d’estas zonas trés tipos distintos de carteles. Los primeiros sirven pa indicar si los locales están abiertos o pechaos (¡Pasade! Esti sitiu está abiertu / Sentímoslo, esti sitiu está pecháu), outros pa señalar la dirección na qu’abren las puertas (tirare / emburriare) y, p’acabar, los últimos distinguen los baños de muyeres (mucheres, na variedá noroccidental) y homes. Están disponibles con diseños y colores variaos pa poder adaptase meyor a la estética de cada sitiu.

Continue reading

Posted in Uncategorized | Leave a comment

Faceira, Furmientu y El Teixu editan un cartel colos nomes de los animales de Llión y Zamora en llionés

Las asociaciones en defensa de la llingua asturllionesa Faceira, Furmientu y El Teixu editan conxuntamente el cartel “La nuesa fauna”, que recueye los nomes populares en llionés de quince de los animales más representativos de Llión y Zamora. Los carteles, que se van presentar na IV Xornada de Patrimoniu Llingüísticu y Cultural, en Villamegil (Cepeda), repartiranse de balde a las escuelas de las zonas falantes d’asturllionés, amás de ponese a la venta en llibrerías.

La IV Xornada de Patrimoniu Llingüísticu y Cultural, qu’organizan Faceira y l’asociación Rey Ordoño I esti sábadu 19 de santamarina nel llugar cepedanu de Villamegil, contará cola presentación del cartel “La nuesa fauna”. Editada conxuntamente por Faceira, Furmientu y El Teixu, esta lámina recueye los nomes tradicionales en llionés de seis aves y nueve mamíferos característicos de la fauna de Llión y Zamora.

Continue reading

Posted in Uncategorized | Leave a comment

Bases del I Concursu de Recoyida de Toponimia Oral d’El Teixu ‘Comarca d’El Bierciu’

Bases completas en pdf.

Posted in Uncategorized | Comentarios desactivados

El Teixu convoca un concursu de recoyida de toponimia oral n’El Bierciu

El Teixu, Rede pal Estudiu y Defensa de la Llingua Asturllionesa, convoca, cona colaboración del Instituto de Estudios Bercianos, y l’apoyu de las asociaciones Faceira, Fala Ceibe y el Colectivo Cultural “La Iguiada”, la primera edición del Concursu de Recoyida de Toponimia Oral d’El Teixu na Comarca d’El Bierciu, col que se va premiar la investigación sobre la toponimia tradicional de la comarca berciana. Los trabayos que quieran participar no concursu tienen qu’entregase primeiro del 15 d’outubre d’aguaño.

Cada participante puede presentar unu ou dellos trabayos a concursu, circunscritos cada unu d’ellos al términu d’un llugar, no que se recoyerá’l máximu posible de topónimos: nomes de llugares y casas, ríos y llagunas, montes y accidentes orográficos, praos y caminos, fuentes y cruces… Los topónimos, en cualquier casu, tienen que tar recoyíos oralmente entre la población del términu y nun se van aceptar variantes artificiosas ou que solo sean de tipu documental ou alministrativu.

Continue reading

Posted in Uncategorized | Comentarios desactivados

El Teixu inicia en Torenu una campaña de normalización del asturllionés

El Teixu, Rede pal Estudiu y Defensa de la Llingua Asturllionesa, empicipióu esta sumana nel municipiu de Torenu una campaña de retulación de locales públicos, cono títulu “Na llingua de casa”. Con esta iniciativa, l’asociación quier faer visible l’asturllionés nos espacios de socialización cotidiana, de manera que la llingua estía presente con normalidá, por voluntá de la xente y porque presta vela, nesos ámbitos a los que güei nun chega.

Cono obxectivu de visibilizar l’asturllionés nos municipios citaos, los miembros y colaboradores d’El Teixu están repartiendo de balde polos comercios y establecimientos públicos de la zona trés tipos distintos de carteles. Los primeros sirven pa indicar si los locales están abiertos o pechaos (¡Pasái! esti sitiu está abiertu / Sentímoslo, esti sitiu está pecháu), outros pa señalar la dirección na qu’abren las puertas (tirare / emburriare) y, p’acabar, los últimos distinguen los baños de muyeres y d’homes. Están disponibles con diseños y colores variaos pa poder adaptase meyor a la estética de cada local.

Continue reading

Posted in Uncategorized | Comentarios desactivados