El Teixu, Rede pal Estudiu y Defensa de la Llingua Asturllionesa acusa públicamente al Conceyu de Cuideiru, ya en particular al sou alcalde, Ignacio Escribano Fernández, d’inacción ya ineficacia absolutas na proxectada retulación viaria de los barrios ya caminos de la parroquia de Samartín.
El 14 de diciembre del 2018 El Teixu presentóu unas alegaciones a la nomenclatura propuesta pol Conceyu de Cuideiru pa retular los barrios ya los caminos de la parroquia. Nesas alegaciones defendíase que la retulación viaria s’axustara a las denominaciones populares de llugares, barrios ya caminos, tal cumo vienen siendo usadas tradicionalmente polos vecinos ya vecinas de la parroquia, ya ofrecíanse xustificaciones de tipu lingüísticu ya etimolóxicu a fin de treslladar correctamente a la retulación pública la toponimia popular. Más de trés meses despuéis d’acabáu el plazu d’alegaciones nun houbo respuesta municipal oficial ya n’El Teixu barruntan que’l conceyu nun vei proceder a instalar la señalización cola toponimia popular de la parroquia de Samartín, que foi aprobada por unanimidá en plenu del 30 de noviembre del 2018.
A la vista de las alegaciones presentadas en diciembre, el teniente alcalde de Cuideiru, Felipe Fernández Marqués, feixo unas declaraciones contradictorias, nas que dicía que se respectaría lo que dixeran ou propuxeran los vecinos, pero tamién que nun usarían oficialmente los nomes de barrios ya caminos si nun había consensu. Nesas circunstancias n’El Teixu dicen nun comprender a qué fin s’abríu un plazu d’alegaciones si la voluntá del equipu de gobiernu yera nun aceptar ninguna modificación que supuxera alterar la propuesta municipal inicial. Na asociación entienden que l’apelación municipal a la “falta de consensu” pa negase a instalar la retulación viaria en Samartín supón pervertir el significáu de la palabra “consensu” pa faela equivalente a “aceptación inapelable” de las decisiones municipales, ya que, a lo último, nun yá más qu’una excusa probe ya pataya pa nun cumplir colo que’l Conceyu tien obligación de faer.
Dende El Teixu aseguran que’l Conceyu de Cuideiru, ya en particular l’alcalde cumo responsable cimeiru, son culpables d’inacción ya demuestran una ineficacia total en cumplimientu de los llabores de gobiernu más elementales. Afirman que l’equipu de gobiernu municipal tendría qu’asumir las reivindicaciones xustísimas de la A.VV. Nuestra Señora de los Dolores, que reclaman la numeración ya la retulación inmediata de los caminos de Samartín, ya las alegaciones argumentadas ya bien documentadas d’El Teixu, que recoyenon ya contrastanon ente la vecindá de la parroquia los topónimos d’usu popular tradicional. Ya añaden qu’interpretar l’aportación de razones ya información por parte de la ciudadanía cumo “falta de consensu” diz mui pouco de la idea de debate públicu, cooperación vecinal ya, en resumidas cuentas, de democracia que manifiesta l’equipu de gobiernu municipal. Ya qu’esa idea mísere de la participación democrática acaba redundando, nesti casu, en dar un serviciu pésimu a la vecindá de Samartín ya en perpetuar la invisibilización de la toponimia local.