Añu d’edición: 2023
Autores: Fernando Álvarez-Balbuena García, Andrés Menéndez Blanco
D.L.: AS 01469-2023
El proceso d’oficialización de la toponimia mayor de tradición oral n’Asturies trae de la mano una necesaria revisión de les entidaes de población actuales. Detéctinse cambeos na so extensión xeográfica, entidaes nueves o que nun tabin recoyíes na cartografía anterior, etcétera. Por eso, amás de señalar les correspondencies ente topónimos oficiales vieyos y nuevos, ye importante definir xeográficamente la posición de caún d’ellos. La serie “Cartografía toponímica del conceyu de Llanera” ye una colección de mapas parroquiales y municipales deseñaos específicamente pa recoyer y localizar los topónimos oficializaos en «Decreto 80/2021, de 22 de diciembre, por el que se determinan los topónimos oficiales del concejo de Llanera», publicáu en Boletín Oficial del Principado de Asturias nº 251 del 31 d’aviento del añu 2021.
La obra consta de trece mapas de trés niveles toponímicos distintos. Dos d’ellos representin el conceyu de Llanera enteru, de los qu’unu recueye les parroquies colos sos límites aproximaos y otru los núcleos de población mayores que figurin con código propiu en nomenclátor d’entidaes de población d’Asturies. Los once restantes tán dedicaos a cada parroquia y representin tolos topónimos oficiales asociaos a puntos. La situación d’estos puntos sigue dos criterios alternativos: nunos casos son centroides de les árees qu’abarquin los topónimos y n’otros sitúinse sobre elementos reconocibles como centrales pola población, como puedin ser les ilesies parroquiales. Al llau de cada mapa represéntase amás un extracto de la tabla publicada en BOPA y los códigos correspondientes a les entidaes de población que los tienin.
El Teixu creó esta obra por encargu de la Conceyalía de Dinamización Social y Comunitaria del Conceyu de Llanera pa facilitar el reconocimientu y localización rápidos de cada topónimo recoyíu en decreto, de manera que se puedan reducir les confusiones y dudes xeneraes poles listes toponímiques oficiales non xeorreferenciaes.
Nos enganches siguientes puedin descargase les versiones llixeres (en formato JPG) de caún de los mapas:
- Llanera. Mapa parroquial
- Llanera. Mapa d’entidaes de población
- Ables. Mapa de la parroquia
- Arlós. Mapa de la parroquia
- Bonielles. Mapa de la parroquia
- Cayés. Mapa de la parroquia
- Ferroñes. Mapa de la parroquia
- Llugo. Mapa de la parroquia
- Posada. Mapa de la parroquia
- Pruvia. Mapa de la parroquia
- San Cucao. Mapa de la parroquia
- Santa Cruz. Mapa de la parroquia
- Villardebeyo. Mapa de la parroquia