Las asociaciones El Teixu, Faceira y Furmientu remitieron al Conseyu d’Europa un informe denunciando que la Xunta de Castiella y Llión infrinxe sistemáticamente la Carta Europea de las Llinguas Rexionales ou Minoritarias (CELRM) del Conseyu d’Europa y las recomendaciones d’esta organización internacional de 2012 y 2016 pa la promoción del llionés. Esta organización internacional tampouco nun recibíu nin de la Xunta de Castiella y Llión, nin del Estáu Español, garante del cumprimientu d’esti tratáu internacional de defensa de las llinguas minoritarias europeas, la información que se-ys solicita dende l’añu 2012 sobre la situación y las mididas adoptadas pa la promoción del llionés.
L’informe documenta razonadamente que Castiella y Llión incumpre neciamente los aspectos esenciales de la CELRM nel casu del llionés, dao qu’esta llingua nun s’ufierta como asignatura nel sistema educativu de la Comunidá (artículu 7.1 f y g del tratáu), l’alministración autonómica nun despliega nenguna medida practica pa la súa promoción (artículu 7.1 c), tampouco nun se facilita’l sou empregu oral y escritu na vida pública y na vida privada (artículu 7.1 d), nin se desenvolvíu lexislativamente l’artículu 5.2 del Estatutu d’Autonomía once años después de la súa entrada en vigor (artículu 7.1 parágrafu inicial). L’informe detalla tamién la política discriminatoria de la Xunta de Castiella y Llión p’hacia los falantes de llionés, vulnerando l’artículu 7.2 de la CELRM, que tien la súa expresión más elocuente nel fechu de que de las tres llinguas qu’ampara y reconez l’Estatutu d’Autonomía nel sou artículu 5, la castellana (la única oficial), la gallega y la llionesa, esta última ye la única que nun tien protección en Castiella y Llión nin presencia nel sistema educativu de la Comunidá.
Nuna próxima visita a España del Comité d’Expertos designáu pol Conseyu d’Europa pa evaluar el nivel de cumprimientu de la CELRM nel nuesu país, representantes de las asociaciones qu’elaboraron l’informe reuniranse con esti órganu cola finalidá de solicitar l’amparu européu ante la política llingüicida de la Xunta de Castiella y Llión, que pretende la definitiva desaparición del llionés.
Subscriben esta nota las siguientes asociaciones en defensa de la llingua llionesa: El Teixu (Asturias, Llión, Zamora y Bregancia), Furmientu (Zamora) y Faceira (Llión).