El Teixu, Rede pal Estudiu y Defensa de la Llingua Asturllionesa organiza esti vienres 3 de agosto n’Oubiñana la charla De Cuideiru a Vaḷḷouta: Historia, situación ya recuperación de los topónimos autóctonos del conceyu de Cuideiru, qu’impartirá’l lingüista Fernando Álvarez-Balbuena García. L’actu vei tener llugar na Escuela de Riegurriba a partir de las 19:30 horas ya la entrada yá de badre.
La xente conoz bien los nomes que dienon tola vida en casa a los pueblos de Cuideiru ¿pero sabemos d’áu vienen esos topónimos? ¿Qué significa Vaḷḷouta, Reseḷḷinas, Salamir ou Cuideiru…? A esas preguntas vei tentar responder Álvarez-Balbuena na charla organizada por El Teixu, qu’amás vei tar abierta a la participación del públicu que quera dir a escuchar ou a aportar los sous conecimientos.
L’actu servirá tamién pa presentar las camisetas que El Teixu acaba de sacar pa defender la toponimia tradicional de Cuideiru. Esta prenda, cola silueta del conceyu ya el lema ¿Sos de Cuideiru? recueye dellos de los nomes autóctonos de los llugares pixuetos. Con esta iniciativa, la organización quier dar respuesta a polémicas artificiales contra la normalización de la toponimia de Cuideiru, producidas pol desconecimientu de las formas populares ou inclusivamente por intereses políticos espurios.
La investigación, recuperación ya defensa de los topónimos tradicionales yá una de las linias de trabayu principales d’El Teixu. Los nomes de los llugares son un un padremuñu cultural qu’entovía pervive na súa forma tradicional en Cuideiru ya nel restu del dominiu asturllionés. Documentalu, usalu ya aprecialu yá la forma d’evitar que se pierda esti tesouru de valor incalculable que yá la toponimia tradicional.
Fernando Álvarez-Balbuena García yá llicenciáu en Filoloxía Hispánica pola Universidá d’Uvieo ya especialista en Filoloxía Asturiana pola mesma universidá. Foi profesor na Universidá Federal Fluminense de Niterói ya na Universidá de Salzburgo ya actualmente puen clas nel Departamentu de Filoloxía Clásica ya Románica de la Universidá d’Uvieo. Foi miembru de la Xunta de Lexicografía de la Academia de la Llingua Asturiana, de la Xunta Asesora de Toponimia del Principáu d’Asturias, del conseyu editorial de la Revista de Filoloxía Asturiana ya del Seminariu de Filoloxía Asturiana. Las súas linias d’investigación son la lingüística histórica románica, la dialectoloxía, la xeolingüística ya la toponimia.