Ivo García Álvarez gana la segunda edición del concursu de recoyida de toponimia d’El Teixu

Ivo García Álvarez resultóu ganador, con “Toponimia menor de Los Montes de la Ermita (Igüeña)”, de la segunda edición del Concursu de Recoyida de Toponimia Oral d’El Teixu na Comarca d’El Bierciu, convocáu por El Teixu, Rede pal Estudiu y Defensa de la Llingua Asturllionesa. Esti concursu, organizáu cona colaboración del Instituto de Estudios Bercianos, tien l’obxectivu de premiar la investigación sobre la toponimia tradicional de la comarca berciana. Nesta ocasión, el trabayu premiáu tien el valor añadíu d’estar dedicáu a un llugar, Los Montes, ensin xente empadronada dende los años 80.

El xuri d’esti segundu Concursu de Recoyida de Toponimia Oral d’El Teixu na Comarca d’El Bierciu, formáu polos investigadores Jonatan Rodríguez Bayo, Xulio Viejo Fernández y José Alfredo Hernández Rodríguez, actuando esti últimu como secretariu del xuri, acordóu outorgar desta un únicu premiu al trabayu tituláu “Toponimia menor de Los Montes de la Ermita (Igüeña)”. Consultada la secretaría d’El Teixu, que previamente s’encargara d’anonimizar las obras presentadas a concursu, el ganador del premiu resultóu ser Ivo García Álvarez, que, cumo ganador, va recibir un premiu consistente nun diploma acreditativu y un lote de llibros de temática berciana y asturllionesa.

Ivo García Álvarez, mineiru de profesión y afeccionáu a la naturaleza, tien publicaos yá deillos estudios de recoyida de la toponimia d’otros llugares d’Igüeña, d’onde ye natural. Nel 2015 foi yá ganador de la primera edición del Concursu de Recoyida de Toponimia Oral d’El Teixu col trabayu “Toponimia menor de Quintana de Fuseros”, mientras que José Álvarez González consiguió un accéssit con “Mapa de Topónimos”.

Con esti concursu El Teixu quier poner en valor el padremuñu que representa la riqueza toponímica, que, esqueicida pola alministración, entovía permanez viva na comarca, cumo una muestra más de la cultura berciana que s’expresa n’asturllionés y en gallegoportugués. La toponimia tradicional ye un tesouru de valor incalculable. La circunstancia de que’l llugar estudiáu nun tenga habitantes empadronaos dende vai años demuestra aínda más la necesidá de recoyer tou esti padremuñu toponímicu primeiru qu’esapareza.

This entry was posted in Uncategorized. Bookmark the permalink.

Comments are closed.