El Teixu presenta un mapa cola toponimia tradicional del conceyu de Tinéu

El Teixu, Rede pal Estudiu y Defensa de la Llingua Asturllionesa presenta un mapa de Tinéu que representa los nomes tradicionales de tódolos ḷḷugares del conceyu, recoíos directamente n’encuestas a los vecinos. Esti mapa, qu’inclúi tamién datos d’oronimia ya hidronimia, vei ser presentáu dientro del programa del homenaxe a Manuel Menéndez García que se celebra esti vienres 27 de febreiru, a partir de las 17:00 horas, na Casa de Cultura de Navelgas.

Ḷḷugares ya brañas cumo Xinestaza, Buḷḷacente, Xera, Silvayyana ou Caeras; cursos d’augua cumo El Ríu Mirayu, El Ríu Faxeirúa ou L’Esva; picos cumo Muḷḷeirosu, Penafilera ou Capieḷḷamartín… Alredor de setecientos topónimos, recoíos íntegramente n’encuestas orales feitas en tódalas parroquias del conceyu, xúntanse nesti trabayu a todu color publicáu por El Teixu, qu’incorpora tamién un mapa parroquial del conceyu, amás de territorios supralocales, casas sueltas, sierras ya puertos de montaña.

El mapa, que se vei distribuír ḷḷou por todu’l conceyu de Tinéu, estrénase esti vienres 27 na Casa de Cultura de Navelgas, dientro del actu “Manuel Menéndez ya la Asturias occidental mediu sieglu despuéis”. Fernando Álvarez-Balbuena García, Andrés Menéndez Blanco ya Mónica Rodríguez Riesgo, autores del trabayu, van ser los encargaos de presentar esti mapa, que cuenta tamién cona colaboración d’Ignacio González, María Cueto, Ramsés Ilesies ya David González. El deseñu del material cartográficu ta al cargu d’Andrés Menéndez Blanco.

Con esta publicación, El Teixu, que tien por obxectivu l’estudiu, la divulgación ya la defensa de la ḷḷingua popular del espaciu asturḷḷionés, inicia una colección de mapas toponímicos de todu’l territoriu d’esti idioma. Asina, quier dignificar ya reconecer el valor d’un patrimoniu, el toponímicu, qu’inda pervive na sua forma tradicional en Tinéu ya no restu del dominiu asturḷḷionés. Documentalu, aprecialu ya usalu yía la forma d’evitar que se perda esti tesouru de valor incalculable que yía la toponimia popular tradicional.

L’homenaxe “Manuel Menéndez ya la Asturias occidental mediu sieglu despuéis”, no que se vei presentar esti mapa, ta organizáu pol Seminariu de Filoloxía Asturiana, el Real Instituto de Estudios Asturianos, l’Aula Valdés-Salas, la Fundación Valdés-Salas ya la Fundación Aula de las Metáforas. Esti actu vei encomenzar a las 17:00 horas d’esti vienres cola intervención de Ramón Rodríguez Álvarez ya cuenta tamién cona presentación del ḷḷibru inéditu de Manuel Menéndez El Cuarto de los Valles. III. Toponimia, refranes y conjuros ya con un recital de poesía al cargu de los poetas Xuan Bello, Antón García ya Miguel Rojo.

This entry was posted in Uncategorized. Bookmark the permalink.

Comments are closed.