El Teixu convoca el segundu concursu de recoyida de toponimia oral n’El Bierciu

El Teixu, Rede pal Estudiu y Defensa de la Llingua Asturllionesa, convoca, cola colaboración del Instituto de Estudios Bercianos, la segunda edición del sou Concursu de Recoyida de Toponimia Oral d’El Teixu na Comarca d’El Bierciu, col que se va premiar la investigación sobre la toponimia tradicional de la comarca berciana. Los trabayos que quieran participar no concursu tienen qu’entregase primeiro del 15 d’outubre d’aguaño.

Cada participante puede presentar unu ou dellos trabayos a concursu, circunscritos cada unu d’ellos al términu d’un llugar, no que se recoyerá’l máximu posible de topónimos: nomes de llugares y casas, ríos y llagunas, montes y accidentes orográficos, praos y caminos, fuentes y cruces… Los topónimos, en cualquier casu, tienen que tar recoyíos oralmente entre la población del términu y nun se van aceptar variantes artificiosas ou que solo sean de tipu documental ou alministrativu.

Las descripciones de topónimos y la información adicional, que pueden estar redactadas en cualquiera de las llinguas d’El Bierciu (asturllionés, gallegoportugués ou castellanu), tienen qu’entregase primeiro del 15 d’outubre del 2016, indicando “Concursu de Recoyida Toponímica”, y incluyendo en páxina aparte los datos personales del autor, por corréu electrónicu a info.elteixu@gmail.com ou por corréu postal a: El Teixu, Rede pal Estudiu y Defensa de la Llingua Asturllionesa. Calle Teleno, 3 – 2º. 24350 Veguellina (Llión).

Un xuri formáu por trés personas, escoyidas entre miembros d’El Teixu, expertos en llingüística y xeografía y estudiosos d’El Bierciu, que nun conocerán l’autoría de los trabayos, va outorgar, primeiro del 31 de diciembre del 2016, un únicu premiu, consistente nun diploma y un lote de llibros de temática berciana y asturllionesa. El xuri puede establecer hasta trés accésits, que recibirán tamién llibros cumo premiu.

Va valorase positivamente la inclusión de fotografías y mapas que permitan la identificación y localización de los topónimos. Igualmente, los trabayos pueden incluír material adicional sobre historia, xeografía, etnografía y vocabulariu del términu en cuestión, así cumo grabaciones ou material audiovisual.

Na primer edición del Concursu de Recoyida de Toponimia Oral d’El Teixu na Comarca d’El Bierciu, celebrada nel 2014, resultóu ganador Ivo García Álvarez, col trabayu “Toponimia menor de Quintana de Fuseros”. Amás, José Álvarez González fora premiáu con un accéssit pol trabayu “Mapa de topónimos”, dedicáu tamién al llugar de Quintana.

Con esta campaña, El Teixu quier poner en valor el padremuñu que representa la riqueza toponímica, que, esqueicida pola alministración, todavía permanez viva na comarca, como una muestra más de la cultura berciana que s’expresa n’asturllionés y en gallegoportugués. La toponimia tradicional ye un tesouru de valor incalculable, que ye necesario recoyer primeiro que desapareza.

BASES COMPLETAS

This entry was posted in Uncategorized. Bookmark the permalink.

Deja un comentario

Tu dirección de correo electrónico no será publicada. Los campos necesarios están marcados *

*

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>