El Teixu celebra’l 29 d’agostu en Sayambre la V Xornada de Patrimoniu Llingüísticu y Cultural

El Teixu, Rede pal Estudiu y Defensa de la Llingua Asturllionesa celebra esti próximu sábadu 29 d’agostu, cola colaboración del Ayuntamiento de Oseja de Sajambre, una nueva edición de la Xornada de Patrimoniu Llingüísticu y Cultural, qu’esti añu tendrá llugar n’Oseya. A partir de las 12:30 horas, pela mañana, y de las 16:30, pela tarde, pela escuela de la capital sayambriega van pasar Xosé Antón Fernández «Ambás», Ramsés Ilesies, Ramón Sordo Sotres, Javier Valentín Rodríguez Bulnes, Gonzalo Barrena, Elena E. Rodríguez Díaz y Fran Allegre, nun ampliu programa qu’incluye conferencias, presentaciones de llibros, un conciertu y un recital poético-musical.
La xornada va comenzar en sesión de mañana, a las 12:30, cola presentacción al cargu d’El Teixu y de las autoridades locales. A continuación, los músicos y investigadores Xosé Antón Fernández «Ambás» y Ramsés Ilesies van ofrecer un conciertu de música tradicional sayambriega, con piezas recoyidas nas encuestas que ḥicioren pelos distintos llugares del municipiu.

Tres d’una pausa pa comer, a las 16:30 de la tarde vuelve la programación cola conferencia Enteradores de Sayambre, Valdión y otros conceyos, na que l’escritor Ramón Sordo Sotres, autor de varios estudios sobre las ḥablas asturllionesas orientales, tratará sobre Ismael Redondo, vecín del pueblu de Pio y autor d’un textu escritu en sayambriegu, amás d’otros informantes llingüísticos de la zona. N’acabando, Javier Valentín Rodríguez Bulnes va presentar el so llibru El habla de Maraña, nel que recueye las características de la llengua d’esti conceyu de la montaña oriental llionesa.

Dimpués será’l turnu de tratar sobre los nombres de los sitios sayambriegos con Gonzalo Barrena, buen conocedor de la toponimia de los Picos d’Europa, que pronunciará la conferencia Los Beyos del Sella: geografía extrema y modos de nombrar. Y tamién habrá tiempu pa la historia y la documentación, de la mano de la profesora de la Universidá de Güelva Elena E. Rodríguez Díaz, que va presentar el so llibru Notas y cuadernos de notas de los Piñán, escribanos públicos de Sayambre (1659-1721), un estudiu exhaustivu de los fondos d’esti arquivu sayambriegu.
Finalmente, va priesllar la xornada l’escritor y músicu Fran Allegre, qu’ofrecerá un recital poético-musical con textos del so llibru Deixando’l cuerpu, acabante publicar.

Las Xornadas de Patrimoniu Llingüísticu y Cultural, organizadas alternativamente por El Teixu y l’asociación Faceira, celébranse anualmente en distintos llugares de la provincia de Llión y pretenden destacar el valor incalculable de las variedades del asturllionés que sobreviven nestas zonas. Dimpués de ḥacese n’Estorga, Llión, Viḷḷablinu y Villamejil, El Teixu quier arimase a una de las variedades más olvidadas del asturllionés, la oriental, celebrando esta quinta edición nel únicu conceyu qu’entavía la conserva en Llión.