El Teixu, Rede pal Estudiu y Defensa de la Llingua Asturllionesa organiza esti vianres 28 de setiambre en Cuideiru la charla Cuideiru ¿por quei?: Historia, situación ya recuperación de los topónimos autóctonos del conceyu de Cuideiru, qu’impartirá’l lingüista Fernando Álvarez-Balbuena García. L’actu vei ser na Casa de Cultura de Cuideiru (La Cai, s/n) a partir de las 19:30 horas ya la entrada yá de baldre.
Tras l’exitu de la charla De Cuideiru a Vaḷḷouta organizada el pasáu 3 d’agostu n’Oubiñana, que contóu con una gran asistencia ya participación de la vecindá, El Teixu vualve organizar un nuavu actu sobre la toponimia del conceyu pixuatu. Con ello, la organización quiar aclarar las dudas sobre los nomes tradicionales de los llugares ya dar respuesta a dellas polémicas artificiales llevantadas en contra de la normalización de la toponimia de Cuideiru.
La xante conoz bian los nomes que diaron tola vida en casa a los puablos, ¿pero sabemos d’áu vianen esos topónimos? ¿A qué realidá xeográfica respuande’l nome Cuideiru? ¿Qué significa Vaḷḷouta, Reseḷḷinas ou Salamir…? A esas preguntas vei intentar responder Álvarez-Balbuena na charla organizada por El Teixu, qu’amás vei tar abiarta a la participación del públicu que quera dir a escuchar ou a aportar los sous conocimiantos.
Nel actu podrán adquirise tamián las camisetas qu’El Teixu sacóu pa dar a conocer ya defender la toponimia tradicional de Cuideiru. Cola siluata del conceyu ya’l lema ¿Sos de Cuideiru? esta prenda recuái dellos de los nomes autóctonos ya ta teniando una gran acoída ente la xante pixuata, polo qu’esta puade ser una de las últimas oportunidades pa facese con una. Amás de na charla, la camiseta puade mercase na villa en Café Agosare ya El Remo, n’Oubiñana en Cai Milio ya La Tiendina ya en Llamuñu en Casa Cendán.
Fernando Álvarez-Balbuena García yá llicenciáu en Filoloxía Hispánica pola Universidá d’Uvieo ya especialista en Filoloxía Asturiana pola mesma universidá. Foi profesor na Universidá Federal Fluminense de Niterói, na Universidá de Salzburgo ya en Departamentu de Filoloxía Clásica ya Románica de la Universidá d’Uvieo. Foi miambru de la Xunta de Lexicografía de la Academia de la Llingua Asturiana, de la Xunta Asesora de Toponimia del Principáu d’Asturias, del conseyu editorial de la Revista de Filoloxía Asturiana ya del Seminariu de Filoloxía Asturiana. Las sus linias d’investigación son la lingüística histórica románica, la dialectoloxía, la xeolingüística ya la toponimia.
La investigación, recuperación ya defensa de los topónimos tradicionales yá una de las linias de trabayu principales d’El Teixu. Los nomes de los llugares son un un padremuñu cultural que tovía pervive na su forma tradicional en Cuideiru ya en restu del espaciu lingüísticu asturllionés. Documentalu, usalu ya aprecialu yá la forma d’evitar que se perda esti tesouru de valor incalculable que yá la toponimia tradicional.