Esti pasáu martes 18 d’outubre votóuse na Comisión d’Educación de las Cortes de Castiella y Llión una proposición non-de-llei presentada por Podemos pa regular la protección, l’usu y la promoción del llionés y pa implantar la materia de llionés dientro de las asignaturas de libre configuración autonómica. La votación foi de nueve votos en contra (del PP) frente a ocho a favor (PSOE, Podemos y IU) y una abstención (Ciudadanos).
Dende l’asociación El Teixu, Rede pal Estudiu y Defensa de la Llingua Asturllionesa nun podemos deixar pasar la vergonzosa intervención de la procuradora popular llionesa Ana Rosa Sopeña Ballina, que xustificóu el votu en contra del sou grupu lliendo mecánicamente un textu que parecía nun entender, zarabatiando repetidamente y exponiendo una argumentación que nos parez tan probe cumo inaceptable. Na pior tradición de la política española, Sopeña Ballina atrevíuse a calcular a güeyu la demanda ciudadana, valorándola a la súa conveniencia y esqueiciendo’l llabor d’asociaciones cumo la nuesa, que trabaya na calle mesmamente entamando campañas de normalización lingüística que nun fai (y que tendría que facer) la Xunta de Castiella y Llión. Porque’l gobiernu del Partido Popular, apesar de las advertencias que recibíu de distintas instancias, empérrase neciamente n’incumplir l’artículu 5.2 del estatutu d’autonomía, que manda regular la protección, l’usu y la promoción d’esta llengua. Un mandatu estatutariu que ye incumplíu pertinazmente y que nesti puntu sitúa a la Xunta de Castiella y Llión directamente fuera de la llei.
La procuradora del PP entróu en contradicciones reiteradamente, reconeciendo que la llengua «tiene un valor y la hay que defender» pa despuéis abarullar dalgunas mididas superficiales de protección, y finalmente acabar votando en contra de todo lo propuesto pa chegar al puntu onde con toda certeza quería chegar dende’l principiu: la nada. Y nun facer nada nun ye una solución que día un futuru dignu a una llengua calificada pola UNESCO cumo en peligru d’extinción. Ye precisamente la total ausencia de mididas políticas a favor del idioma la que fai que muchos llioneses abandonen l’usu ou pierdan l’accesu a una llengua defenestrada polas alministraciones y desprotexida pol gobiernu que tien obrigación estatutaria de protexela.
Finalmente, ye obrigao recorda-y a doña Ana Rosa Sopeña Ballina y al PP que Llión ye una rexón na que se da de facto una situación de plurilingüismu ente gallegu, llionés y castellanu. Y n’El Teixu, cumo asociación vinculada a todu’l dominiu llingüísticu asturllionés, préstanos tamién aseñala-y que Llión ye, dende un puntu de vista xeográficu, el centru d’esti espaciu lingüísticu, y que por ello amerita una llei y una política efectiva dende la Xunta de Castiella y Llión que sea capaz a promover y garantir l’usu del llionés cumo llengua viva.