El Teixu impulsa alegaciones a la retulación pública de la toponimia de Samartín (Cuideiru)

El Teixu, Rede pal Estudiu y Defensa de la Llingua Asturllionesa acaba  presentar, cola ayuda de l’Asociación de Vecinos Nuestra Señora de los Dolores, y cola colaboración destacada de Carolina Castro y Vanesa Álvarez, alegaciones a la nomenclatura propuesta pol Conceyu de Cuideiru pa la toponimia de la parroquia de Samartín. El documentu d’alegaciones busca que’l consistoriu respecte los nomes tradicionales que la vecindá sigue usando pa facer referencia a los sitios de la parroquia.

El plenu del Conceyu de Cuideiru aprobóu, el pasáu 30 de noviembre, l’expediente “Relación de caminos y/o viales de La Escalada, Castañedo, Argatón, Mumayor y Beiciella en San Martín de Luiña (Cudillero)”, col que se pretende normalizar ya retular los barrios y caminos d’estos cinco nuclios de la parroquia de Samartín. En virtú del procedimientu d’exposición pública del expediente, Carolina Castro ya Vanesa Álvarez, vecinas de la parroquia, presentanon esti vienres 14 un documentu de revisión ya propuesta de modificación del mesmu, redactáu xunto con miembros d’El Teixu ya l’A.VV. Nuestra Señora de los Dolores.

La propuesta de modificaciones tien cumo principiu esencial el respectu fiel ya escupilosu de las denominaciones populares ya tradicionales de la vecindá d’estos pueblos, a fin de que sean treslladadas a la nomenclatura oficial ya a la señalización de la manera más fiel posible. Asina, nel documentu inicial del conceyu categorizábanse cumo caminos entidades qu’en verdá son barrios, omitíanse artículos ya hasta se recoían denominaciones deturpadas. Las alegaciones recuéin tamién propuestas pa regularizar ortográficamente la toponimia, pa lo que s’ofrecen xustificaciones de tipu lingüísticu ya etimolóxicu.

Aculló de la culpabilidá que, por activa ou por pasiva, tienen tódalas alministraciones implicadas (autonómica ya local), que, en contra de lo que dicta la llei, permiten que sigan siendo oficiales nomes deturpaos ou que nun respuenden a la tradición lingüística autóctona, yá irrelevante la entidá que s’encargue de la normalización toponímica siempre que se respecten los nomes tradicionales. Nesti sentíu, yá necesario destacar que, anque’l teniente d’alcalde de Cuideiru, Felipe Fernández, aseguróu que “nosoutros respectamos lo tradicional ya lo que digan los vecinos”, n’expediente publicáu pol Conceyu faltan dellas de las correcciones que fixera l’A.VV. Nuestra Señora de los Dolores, nas que yá taba presente la voluntá de respectar los nomes populares. Por todo esto, El Teixu reclama al consistoriu que tenga en cuenta esti nuevu documentu, qu’amplía ya matiza aquella propuesta ya que sigue contando col refrendu de la voluntá popular.

La investigación, recuperación ya defensa de los topónimos tradicionales yá una de las linias de trabayu  principales d’El Teixu. Los nomes de los llugares son un padremuñu cultural vivu que yá necesario mantener ya visibilizar, respectando los usos de los vecinos vinculaos al territoriu. Pa ello, existen técnicos especializaos que pueden recoyer ya reproducir los topónimos de la manera más fiel posible a los usos tradicionales. Esta xuntura de los profesionales ya la vecindá yá la base na qu’hai que s’apoyar pa evitar errores cumo los que tán presentes n’expediente de Samartín, onde se percibe la falta d’un trabayu de campu por parte de personal especializáu, ya pa garantir una toponimia oficial que nun perpetue decisiones unilaterales.

This entry was posted in Uncategorized. Bookmark the permalink.

Comments are closed.