El Teixu fai llabores d’asesoramientu lingüísticu a instituciones y organizaciones que desenvuelvan acciones orientadas a la normalización del asturllionés.
Retulación toponímica en La Cuesta
La Cuesta, Cabreira l’Alta, Llión (noviembre del 2023). El Teixu colaboróu cola Xunta Vecinal de La Cuesta y l’Ayuntamientu de Trueitas na colocación de placas colos nomes de las calles, plazas y edificios principales d’esti llugar. L’asociación fixo trabayos d’encuestación a la población local pa recoyer los topónimos de tradición oral y preparóu un planu colos resultaos. Esti documentu foi la base pa la preparación y colocación de las placas nuevas. El planu puede descargase aquí.
Informe sobre’l topónimu Forniella
Forniella, Llión (febreiru del 2022). El Teixu redactóu un informe sobre’l topónimu Forniella pol interés mostráu pol ayuntamientu local de cambiar la denominación oficial del municipiu de «Peranzanes» a «Fornela». Esti informe divídese en dúas secciones. Una recueye referencias de testemuños orales del topónimu Forniella y l’outra fai un repasu a las menciones escritas dende los primeiros documentos medievales. L’informe presentóuse al ayuntamientu col obxectivu de reclamar la oficialización del topónimu popular local de tradición oral Forniella y non la forma alóctona Fornela. El documentu puede descargase aquí.
Retulación toponímica en Felechares, San Feliz y Calzada
Castrucarbón, Llión (setiembre del 2021). El Teixu colaboróu col Ayuntamientu de Castrucarbón na retulación toponímica de las calles, plazas y caminos de los llugares de Felechares, San Feliz y Calzada. Dende l’asociación fixéronse encuestas a la población local pa recoyer los nomes populares de tradición oral, que quedaron recoyíos n’informes que se presentaron al Ayuntamientu. Tamién se propuxo un modelu de placa pa cada llugar que inclúi un debuxu del pendón local a la vera del topónimu. La noticia d’estos trabayos puede llese aquí.
Informe toponímicu d’Ordás
Ordás, Llión (outubre del 2018). El Teixu redactóu y entregóu al Ayuntamientu d’Ordás un informe que recueye los nomes populares de los llugares del municipiu y la súa etimoloxía. Pa ello fíxose primeiro una campaña d’encuestación oral que permitíu avanzar no conecimientu de la toponimia y trazos lingüísticos d’esti territoriu.
Retulación toponímica nas carreteras de Cabreira l’Alta
Cabreira l’Alta, Llión (santamarina del 2015). El Teixu asesoróu al Ayuntamientu de Trueitas pa la instalación de señales viarias indicadoras de la dirección y entrada a los llugares del municipiu. L’asociación aportóu una lista de los nomes de tódolos núcleos fecha a partir d’encuestas propias a la población local. La noticia de la colocación de las señales nuevas puede vese aquí.