Entrega de premios del I Concursu Infantil de Recoyida de Toponimia Oral na Valdería
Irene Turrado Cenador, alumna del CRA Eria-Jamuz, resultóu ganadora del I Concursu Infantil de Recoyida de Toponimia Oral na Valdería, organizáu por El Teixu, Rede pal Estudiu y Defensa de la Llingua, con un trabayu sobre Castrucarbón. Los segundos premios fueron pa Carla Aparicio Turrado, na categoría de 3 a 6 años, que recoyíu la toponimia de Felechares, Joel Oller Gastón, na categoría de 6 a 9 años, qu’estudiou los ñombres de Torneiros, y Sebastián Pérez Carrera, na de 10 a 14 años, con un estudio sobre los topónimos de San Feliz. Los premios, consistentes nun lote de llibros y de productos artesanos, fueren entregaos esta mañana nel Centru Cultural de Ñogareyas, no marcu de las VI Xornadas de Patrimoniu Lingüísticu y Cultural organizadas por El Teixu.
El xuri, formáu pola filóloga estudiosa de la fala de La Valdería Isidora Rivas Turrado, l’expertu en xeografía y arqueoloxía Andrés Menéndez Blanco y el sociólogu Dennis Álvarez Guerrero, decidíu premiar estos trabayos entre los veinti presentaos a concursu, por ser aquellos que meyor representaban los ñombres tradicionales de los sitios, de la manera qu’ontavié se puede sentir entre los habitantes de La Valdería.
L’actu d’entrega contóu amás cona charla ¿Cúmo se faz una investigación toponímica de campu?, al cargu del lingüista de la Universidá d’Uvieo Fernando Álvarez-Balbuena. Pa rematar, Andrés Menéndez Blanco presentóu la colección de mapas d’El Teixu Cartografía toponímica del espaciu lingüísticu asturllionés, de la qu’acaba de publicase’l primer númaru, correspondiente al conceyu asturianu de Tinéu, y diou cuenta del estáu de los trabayos de los mapas de las provincias de Llión y Zamora.
Las Xornadas de Patrimoniu Lingüísticu y Cultural continúan esta tarde conas microconferencias de José R. Morala, Mónica Rodríguez Riesgo, Alcides Meirinhos y Nicolás Bartolomé Pérez, amás del ciclu documental La fala de los nuestros paisanos y l’espectáculu de cuentacuentos Us cuentus del filandare, al cargu de José Luis Gutiérrez “Guti”. Mañana domingu,
Máximo Carracedo oficiará la IV misa d’avientu n’asturllionés y Isidora Rivas Turrado ofrecerá la charla Voces del Eria: el leonés hablado en La Valdería. Proxectaranse tamién la serie audiovisual d’El Teixu Videoteca de la llingua asturllionesa y el ciclu de videos musicales Xuntos na diversidá, y El Solito Trovador pondrá’l remate a las xornadas cona estrena de la obra musical La fala d’un cantar.
El conecimientu de la toponimia tradicional del espaciu lingüísticu asturllionés ye unu de los obxectivos principales d’El Teixu, no que trabaya tanto cona investigación directa cumo promoviendo concursos de recoyida toponímica. Dispués de la realización de dous certámenes de recoyida p’adultos no Bierciu, con esti concursu El Teixu estrénase na Valdería con un formatu completamente ñuevu, dirixíu a los más pequeños de la casa.