Los topónimos son una clas de nomes propios que las comunidades humanas usan pa individuar y identificar los sitios. Esos nomes tienen la peculiaridá de tar referencialmente vinculaos al espaciu, de tar “prendíos a la tierra”. Cola palabra toponimia referímonos tanto a la disciplina llingüística qu’estudia los topónimos cumo al conxuntu de los topónimos asociaos a un espaciu determináu.
La toponimia mayor ye aquella que da nome a núcleos de población y territorios y, en xeneral, a entidades xeográficas estensas. La toponimia mayor carez unos procesos de deturpación qu’abondas veces escuenden los nomes populares tradicionales detrás d’unos topónimos oficiales que nun respuenden a la realidá de los usos llingüísticos vivos ente la xente.
Nesti momentu existen trés situaciones diferentes en cuanto al tratu que recibe de las alministraciones públicas la nuesa toponimia popular:
-
N’Asturias hai un procesu abiertu de revisión toponímica y de restitución de los nomes populares nos nomenclátores oficiales de las entidades de población;
-
En Bregancia hai un reconecimientu y usu desigual por parte de l’alministración, con dellas retulaciones dobles (nome oficial portugués y nome popular asturllionés) nel Concellu de Miranda, y una ausencia total de los topónimos populares nas tierras de Vumiosu y na feligresía de Ruidenore;
-
En Llión y Zamora nun hai nenguna política de revisión nin de protección de los topónimos tradicionales.
D’outra banda, la toponimia menor, aquella que da nome a tódolos accidentes del paisaxe, piérdese pola caída demográfica nas áreas rurales y pola fin del modelu económicu tradicional. La desvinculación del espaciu au viven que se ta dando ente las xeneraciones más nuevas, produz l’esqueicimientu d’esti padremuñu compuestu por cientos de miles de nomes que tienen, nuna gran parte de los casos, un orixe medieval.
El Teixu, amás de los cursos que fai pa formar encuestadores que recueigan esti material de boca de los sous usuarios y depositarios, tien ente los sous obxectivos l’estudiu, la divulgación y la defensa de la toponimia popular del espaciu llingüísticu asturllionés.