El Teixu organiza esti vienres 20 en Caguaḷḷes d’Abaxu un Magostu Cultural

El Teixu, Rede pal Estudiu y Defensa de la Llingua Asturllionesa organiza na Casa del Pueblu de Cagüaḷḷes d’Abaxu esti próximu vienres 20 de noviembre a partir de las 20:00 horas un Magostu Cultural con música, castañas ya toponimia. L’actu va contar cona presencia de Fernando Álvarez-Balbuena, que va impartir la charla “Por qué Caguaḷḷes se chama Caguaḷḷes ya outras cuestiones toponímicas de Ḷḷaciana ya la redondada”. A continuación, va celebrase un filandón con música tradicional ḷḷacianiega en directo.

Pa continuar cono ḷḷabor realizáu n’outras comarcas, El Teixu ḷḷieva esti vienres 20 de noviembre la súa actividá a Ḷḷaciana, más concretamente a la Casa del Pueblu de Cagüaḷḷes d’Abaxu, onde va celebrar un Magostu Cultural no que se va tratar de la toponimia ḷḷacianiega ya va contase con música tradicional de la zona.

La xornada va comenzar a las 20:00 horas cona conferencia de Fernando Álvarez-Balbuena “Por qué Caguaḷḷes se chama Caguaḷḷes ya outras cuestiones toponímicas de Ḷḷaciana ya la redondada”, na que se desvelarán dalgunos datos de los nomes tradicionales de los sitios ḷḷacianiegos. Álvarez-Balbuena yía linguista, miembru del Seminariu de Filoloxía Asturiana de la Universidá d’Uvieo, ya conoz bien la toponimia de la zona, onde tien realizadas numerosas encuestas, encuadradas dientro del trabachu de recolección toponímica d’El Teixu.

Despuéis de la parte más didáctica, el Magostu va continuar a las 21:00 horas con un filandón ya con música tradicional ḷḷacianiega en directo. Ya, por supuesto, cumo correspuende a un magostu, con castañas ya vinu pa celebrar l’outuenu.

Esta actividá yía un frutu más del trabachu de recochida ya dignificación de la toponimia tradicional qu’El Teixu ḷḷieva a cabu en todu’l dominiu linguísticu asturḷḷionés. Con esti tipu d’actos El Teixu quier recuperar ya reivindicar la toponimia tradicional, esqueicida ya maltratada pola nomenclatura oficial; concienciar a la población del tesouru que representa toda la riqueza toponímica que conservan los falantes d’asturḷḷionés; ya colaborar na súa defensa ya puesta en valor.

This entry was posted in Uncategorized. Bookmark the permalink.

Comments are closed.